原创林建明海上梦叠
作者：林建明
沪语改写：金慧玉
讲述：陈美莲
审阅、推荐：丁迪蒙
编辑：王乙其
今年夏季个蔬菜里向，我对丝瓜个爱怜是唯一个，只是等到现在，勿仅呒没尝到新瓜个滋味，连得一朵黄灿灿个小花也没看到，我甚至严重怀疑搿棵丝瓜个性别了。
瓜苗长勒院子个东北角，沿牢斜靠了围墙个方料，抖豁豁个越过墙头，小脑袋勒勒墙外。东南角有两棵牵牛花，也越过墙顶，伊拉面对个，是旧年存心呒没拆脱个瓜架，几根方木，像一块床板搁勒两堵围墙个上头，假使瓜藤爬满，倒也算是个避暑个好地方。想象一下，青藤绿叶黄花，拿烈日炎阳遮挡脱了；结瓜个时节，一条条青绿个丝瓜垂挂勒架子浪，确实有种清淡雅致个美。假使有得习习凉风滑过粘嗒嗒个身体，搿再叫是个爽字。
但是，此刻，我个心也变成功抖豁豁个。四月初，弄好了小菜地，却勿好出小区，伊眼本来种辣椒、落苏苗个地方，撒了适应冬天生长个黄芽菜种子。但是，我还是留了点空地，等待丝瓜去补白。巧个是，隔壁人家讲有得瓜籽。去要了一眼。掼了十几粒籽，发了十几棵芽，却勒勒之后个疙疙瘩瘩个日脚里，勿晓得啥个原因，相继枯萎，由固定下来个六棵，变成功了三棵，现在呢，只挺下来搿个棵独苗了。
丝瓜是邪气有灵性个植物，呒没直立个骨架，却又邪气好面子，伊个藤蔓勿会得弯腰，勿像牵牛花搿能，主动去缠绕附着物，每生长一截，就伸出一根细长个触须，勿要看伊脆弱得像玻璃丝，只要勾触到物体，伊就会得像蛇一样缠上去，一根就是颠簸之船抛下来个一条锚链。呒没缠到物体浪个触须，就知趣个卷成功一串，像生了锈个弹簧。
欢喜丝瓜是年再有个事体，也是我搬到小区个第二年。房子后头有块荒地，野草杂树丛生。妻子看中一块地方适合种眼丝瓜，阿拉两家头用洋镐、铁锹挖了一下半日，开出一块麻将桌大小个方地。清明过脱之后，买了几棵丝瓜苗种下去，好像没费啥力气，也没哪能去打理、服侍伊拉。瓜苗种下去之后，只不过浇了几趟水粪，帮伊拉搭了只架子，安家了。然后，就看到伊拉慢慢叫爬满了木架，漂亮个小黄花从下到上逐渐开放，翠绿色个丝瓜像吹气一样日长夜大，丰盈了屋里个餐桌。有辰光，小囡上班勿回来吃饭，阿拉就勿去菜场了。摘个两三根回来，褪脱外衣个丝瓜，又白又嫩，像剥皮个香蕉一样软，我甚至勿忍心用刀去切伊拉。烧热个镬子里，淋菜籽油爆炒，再加几只搅拌均匀个鸡蛋，翻炒几记，就上台子了，黄绿交织，相互纠缠，看看就有用手去拣个欲望，啥个味精鸡精，老姜香葱，加啥侪是浪费，多余，侪是画蛇添足。
迭个滋味就驻留勒味蕾个一角，尽管家主婆也勒菜场里买过看上去差勿多个丝瓜，用同样个土鸡蛋配过，却撼勿动味蕾当中储蓄过个滋味。
其实，夏季是一年当中蔬菜最丰盈，品种最多个季节。丝瓜也勿是啥个高档食材，大概人一上年纪，骨头脆了，内心就开始柔弱了，对某些物事、某些人、某些事体有了独特个念想。
即便是一棵勿起眼个丝瓜苗。
作者：林建明
讲述：陈美莲
——————————————————
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。
沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。
沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》，少年儿童出版社
《囡囡学成语》，少年儿童出版社
原标题：《丝瓜》